Këshilli i Lartë Gjyqësor është mblidhur sot dhe ka vendosur të pezullojë nga detyra gjyqtaren e Krujës, Enkeleda Hoxha.
“Sot, në datën 15.02.2021, Këshilli i Lartë Gjyqësor zhvilloi mbledhjen plenare të radhës, në të cilën u njoh me vendimin e marrë nga Gjykata e Posaçme e Shkallës së Parë për Korrupsionin dhe Krimin e Organizuar, për magjistraten Enkeleda Hoxha, me detyrë gjyqtare në Gjykatën e Rrethit Gjyqësor Krujë. Pasi dëgjoi relatimin nga Komisioni Disiplinor, Këshilli me vendimin nr.53, pezulloi nga detyra magjistraten”, thuhet në një njoftim të KLGJ-së.
Gjyqtarja u arrestua disa ditë më parë me akuzën e lirimin nga burgu të të dënuarve kundrejt ryshfetit. Gjykata e Posaçme vendosi arrest me burg për të.
Inspektori i Lartë i Drejtësisë, Artur Metani ka kërkuar shkarkimin e saj me argumentin se cënon figurën e gjyqtarit.
