Me dhjetëra automjete u bllokuan pasditen e së shtunës në aksin Milot-Lezhë, disa prej tyre e kaluan natën në temperatura nën zero gradë. Ergys Verdho, drejtor i Autoritetit Rrugor, i kontaktuar nga MCN tha se situata erdhi si pasojë e një cikloni që ndodh njëherë në 100 vjet. Sipas tij, kompania Geci, përgjegjëse për mirëmbajtjen e rrugës, ka vepruar konform kontratës, por ndërhyrja është vonuar si pasojë e trafikut kaotik.
“Borëpastrueset kanë zbritur nga kontrata e Skuraj-Burrel për të kriposur vendin në orën 11:00. Dendësia e mjeteve ishte aq e madhe dhe përdorimi i gomave të verës në këtë sezon destabilizoi trafikun. U krija anomali nga dy trajlera që bllokuan rrugën. Në të dy krahët e rrugës u krijuan rradhë treshe”, tha Verdho.
Sipas tij, kompania ka vepruar në kushte ekstreme.
“Ka performuar sipas kontratës, por këto janë raste ekstreme. Njëherë në 100 vjet ndodh që të kemi ciklon të tillë”, tha Verdho.
Për situatën është vënë në lëvizje edhe policia e Lezhës. Burime zyrtare i konfirmuan MCN se janë duke u bërë verifikimet e para në terren për kompaninë Geci. Të hënën, materialet i kalojnë prokurorisë për veprime të mëtejshme.
Tomorri: Prokuroria duhet të hetojë, shqiptarët paguajnë 156 milionë USD për rrugët
Gazetari Klodian Tomorri shprehet se është e patolerueshme mungesa e asistencës në situata të tilla, në një kohë kur qytetarët shqiptarë paguajnë 156 milionë dollarë për mirëmbatjen e akseve kombëtare.Tomorri shprehet se rasti në fjalë është një indicie e fortë që prokuroria të nisë hetimet për të gjithë projektin 156 milionë dollarë të mirëmbajtjes dhe sigurisë rrugore, duke përfshirë prokurimin, zbatimin por edhe mbikëyrjen e tij si nga Autoriteti Rrugor Shqiptar ashtu edhe nga konsulenti i pavarur. Kjo sipas Tomorri, pasi veç 156 milionë dollarëve për mirëmbajtjen, taksapaguesit shqiptarë paguajnë edhe një kompani konsulente që mbikqyr zbatimin e kontratave të mirëmbajtjes.
