20-vjeçari me iniciale K.G., i cili dyshohet se ka publikuar një shpallje ku ka ofruar votën e tij që i garantohet me kushtetutë që ta shesë për para është identifikuar nga Policia e Kosovës.
Lajmin për mediat e ka konfirmuar zëdhënësi i Policisë së Kosovës për Mitrovicë, Avni Zahiti.
Pas deklaratës në polici, i riu është lënë i lirë.
“Pas intervistës nga Prokurori i Shtetit, Policia e Kosovës ka liruar të dyshuarin me procedurë të rregullt.
Identifikohet personi i dyshuar për veprën penale dhënie ose marrje e ryshfetit në lidhje me votimin
Në orët e mbrëmjes së datës 12 shkurt 2021, hetuesit policor në kuadër të Stacionit Policor në Skenderaj, kanë identifikuar dhe intervistuar një person të dyshuar për veprën penale dhënie ose marrje e ryshfetit në lidhje me votimet.
Veprimet hetimore janë ndërmarrë me autorizim të prokurorit, mbi dyshimet e bazuara se i dyshuari në një faqe të rrjeteve sociale ka publikuar-shpallur se shet votën e tije sipas marrëveshjes.
Si rezultat i veprimeve hetimore, është lokalizuar dhe identifikuar personi i dyshuar K. G., 20 vjeçar, shtetas i Republikës se Kosovës, i cili është shoqëruar për intervistë.
Ndërsa pas intervistës me urdhër të prokurorit të çështjes, i dyshuari është liruar në procedurë të rregullt.
Ndaj tije është iniciuar rast për veprën penale dhënie ose marrje e ryshfetit në lidhje me votimin neni 212 “./ Express
