Një denoncim i pazakontë ka ndodhur në Durrës, ku një 60-vjeçar me inicialet J.SH., është denoncuar nga menaxherja e një supermarketi, për vjedhjen e një pako djathë kaçkavall dele me peshë 0.228 gram. Ky produkt kushtonte 250 lekë të reja, por pavarësisht kësaj shume qesharake, menaxherja nuk ka nguruar, por ka vijuar duke e denoncuar rastin në policinë e Durrësit.
Burri, ka shkuar në supermarket për të blerë letër higjienike, por gjatë kësaj kohë rezultoi se kishte marrë dhe një pako të vogël me kaçkavall. Denoncimi është marrë nga policia e Durrësit, në datën 5 shkurt 2021, duke kërkuar kryerjen e verifikimeve të mëtejshme nga prokuroria e Durrësit.
Sipas materialit hetimor, personi që ka denoncuar është menaxherja me inicialet M.A., e cila pasi ka vërë re veprimet e dyshimta të 60-vjeçarit, ka parë këtë të fundit se ka marrë nga banaku dhe ka futur në xhep një pako të vogël me djathë kaçkavall.
“…mua më ka bërë përshtypje ky veprim dhe e kam mbajtur në mbikëqyrje, derisa burri ka ardhur tek kasa ku isha unë. Ai ka kaluar në kasë vetëm një letër higjienike ndërsa djathin jo. Duke qenë se në kasë kishte njerëz të tjerë,unë i kam thënë që të vinte tek zyra dhe flisnim veç me të. Ku i kam thënë kështu,ai e ka nxjerrë djathin nga xhepi dhe e ka hedhur në tokë. Aty ne i kemi kërkuar që të bëjë pagesën, për produktin që kishte marrë po ai nuk ka pranuar dhe në këto kushte, ai më ka thënë se nuk kam çfarë të flas me ty…”, ka treguar ndihmës menaxherja.
Lidhur me këtë çështje, policia e Tiranës ka marrë në pyetje dhe 60 vjeçarin J.Sh., i cili ka deklaruar se është klient i përhershëm i këtij supermarketi, ku në 5 shkurt kam blerë një pako të vogël kaçkavall dhe një letër higjienike.
“…në momentin që kam shkuar për të paguar,tek kasa kam nxjerrë portofolin dhe në mënyrë instiktive, në vend që të fusja portofolin në xhep, kam futur djathin dhe vajza që ishte tek kasa, akoma pa përfunduar të gjitha veprimet, më ka thënë që hajde pak tek dhoma prapa. Unë kam ngelur i çuditur pasi nuk po kuptoja se çfarë po ndodhte dhe ajo më ka kërkuar që ti tregoja se çfarë kisha në xhep. Kam kontrolluar xhepat dhe aty kam kuptuar se në vend të portofolit, kisha future në xhep një pako djathë 200 gramë. Në këtë moment i ka kërkuar falje dhe kam qenë i gatshëm sipas kërkesës së saj, që unë të paguaja gjobën prej 250 mijë lekë të vjetra të reja. Por ajo ka lajmëruar policinë, e cila ka ardhur dhe më ka shoqëruar në komisariat. Për mua është e papranueshme diçka e tillë, pasi jam njeri i ndershëm dhe serioz dhe nuk i bie kujt në qafë…”, ka pohuar 60-vjeçari. /Ora News/
