Partneri i Britney Spears, Sam Asghari, theu heshtjen e tij ndaj babait të këngëtares, Jamie Spears, pas publikimit të dokumentarit “Framing Britney Spears”, nga “New York Times”.
27-vjeçari postoi një status në Instastory të martën në mëngjes, ku shprehte përbuzje për Jamie Spears, i cili kontrollon jetën dhe financat e vajzës së tij të madhe që nga viti 2008, pas problemeve me shëndetin mendor dhe abuzimit me substancat narkotike, shkruan “Rollig Stone”.
“Është e rëndësishme që njerëzit të kuptojnë që kam zero respekt për dikë që përpiqet të kontrollojë lidhjen tonë dhe të na vendosë pengesa. Për mendimin tim, Jamie është totalisht një ‘dick’.
S’do të jap më shumë detaje, sepse gjithmonë e kam respektuar privatësinë tonë, por nga ana tjetër nuk erdha në këtë vend për të mos pasur mundësi të jem i lirë dhe të shpreh opinionin tim.”- shkruan partneri i Britney-t.
Kujtojmë se Britney, e cila është kundër “kontrollit” nga i ati, është përballur me këtë të fundit në gjykatë, por përgjigja për të ka qenë sërish negative.
Gjykatësja nuk pranoi të pezullojë James Spears nga kontrolli që ka ai mbi jetën dhe karrierën e vajzës prej 12 vitesh. Për këtë arsye, avokati i Britney-t njoftoi se këngëtarja ka vendosur të heqë dorë nga muzika për aq kohë sa i ati nuk heq dorë prej saj.
