Policia e Tiranës ka mësyrë në ambientet e spitalit “Covid2”- “Shefqet Ndroqi” këtë të Hënë, duke arrestuar katër pjesëtare të këtij spitali.
Mësohet se arrestimet janë kryer në zbatim të urdhërit të gjykatës së Tiranës dhe të kërkuara nga prokuroria, në vijim të hetimeve për rastin e sanitares Tire Allidervishi.
Kjo e fundit, aktualisht pas hekurave nën masën e arrestit me burg, akuzohet për mashtrim. Ajo u denoncua nga emisioni investigativ “Stop” se përmes mashtrimit, duke u hequr si infermiere, i kishte zhvatur të afërmve të një pacienteje me koronavirus miliona lekë.
Për hetuesit, personeli i arrestuar këtë të Hënë, ka bashkëpunuar me sanitaren në këtë skandal.
Sipas hetimeve, personat e arrestuar kishin krijuar një skemë me qëllim që të përfitonin në kurriz të pacientëve të sëmurë me koronavirus.
Të arrestuarat
Personat e arrestuar janë tre infermiere dhe një sanitare.
Në pranga janë vënë:
Mira Bushi, e datëlindjes 21.07.1969, lindur dhe banuese në Tiranë, me detyrë infermiere e spitalit universitar ‘Shefqet Ndroqi’, si person i dyshuar per kryerjen e vepres penale te ‘Shpërdorimit te detyrës’ dhe ‘Mashtrimit’.
Sheqerije Koçi, e datëlindjes 26.10.1960, lindur në Librazhd dhe banuese në Tiranë, me detyrë infermiere e spitalit universitar ‘Shefqet Ndroqi’, si person i dyshuar per kryerjen e vepres penale te ‘Shpërdorimit te detyrës’ dhe ‘Mashtrimit’.
Sidorela Çela, e datëlindjes 17.08.1993, lindur në Pogradec dhe banuese në Elbasan, me detyrë infermiere e spitalit universitar ‘Shefqet Ndroqi’, si person i dyshuar per kryerjen e vepres penale te ‘Shpërdorimit te detyrës’ dhe ‘Mashtrimit’.
Rukije Hoxhaj, e datëlindjes 20.02.1964, lindur dhe banuese në Tiranë, me detyrë sanitare e spitalit universitar ‘Shefqet Ndroqi’, për veprën penale të ‘Mashtrimi’.
