Mijëra njerëz kanë mbushur sheshet e Mianmarit si kundërshtim ndaj grushtit të shtetit dhe duke kërkuar lirimin e lideres Aung San Suu Kyi.
Turma e zemëruar ka mbajtur në duar pankartat ku shkruheshin thirrje si: ‘’Kundër diktaturës ushtarake ”.
Protestat u zhvilluan pavarësisht se në vend pati ndërprerje të internetit.
Ndërkohë, transmetuesi shtetëror gjatë gjithë ditës ka shfaqur skena që lavdëronin ushtrinë.
Grupi i monitorimit NetBlocks raportoi një “ndërprerje të internetit në shkallë kombëtare”, duke thënë në Twitter se lidhja kishte rënë në 16% të niveleve të zakonshme.
Zyra e Kombeve të Bashkuara për të Drejtat e Njeriut tha në Twitter se “interneti dhe shërbimet e komunikimit duhet të rikthehen plotësisht për të siguruar lirinë e shprehjes dhe qasjen në informacion”.
Gjithashtu, autoritetet kishin urdhëruar të gjithë operatorët celularë të mbyllin përkohësisht rrjetin e të dhënave, megjithëse shërbimet e zërit dhe SMS mbetën të hapura.
Grupet e shoqërisë civile të Mianmarit u bënë thirrje ofruesve të internetit për t’i rezistuar urdhrave të juntës, duke thënë në një deklaratë të përbashkët se ata “në thelb po legjitimonin autoritetin e ushtrisë”.
Shefi i ushtrisë Min Aung Hlaing mori pushtetin duke pretenduar mashtrim, megjithëse komisioni zgjedhor thotë se nuk ka gjetur prova të parregullsive të përhapura në votimet e nëntorit, ku liderja demokrate fitoi me 70% të votave. /The Reuters
