Kreu i Asamblesë së Turqisë, Mustafa Sentop, lëshoi mesazhe kundër gulenistëve nga Tirana, gjatë një fjalimi për mediat krah kreut të Kuvendit, Gramoz Ruçi.
Sentop, ndodhet në një vizitë zyrtare në Shqipëri, të cilën e ka nisur me një takim me kreun e Kuvendit, Gramoz Ruçi. Pas takimit me Ruçin, Sentop, gjatë një konference për shtyp foli për “Feto”, të cilën Ankaraja zyrtare e ka shpallur organizatë terroriste dhe e akuzon për përpjekjen për grushtin e shtetit ndodhur në Turqi në vitin 2016.
Ai se Turqia nuk do të lejojë që kjo “organizatë terroriste tinëzare” të ndikojë në marrëdhëniet mes dy vendeve.
“Feto është një organizatë që shkoi deri aty, sa të bombardojë edhe parlamentin e Turqisë, që ishte në seancë plenare. Në Turqi kjo organizatë është eliminuar në masë të madhe. Ashtu si në vende të ndryshme kjo organizatë terroriste është prezente edhe në Shqipëri, por nuk është vetëm Turqia objektivi i kësaj organizate terroriste tinëzare e nivelit ndërkombëtar. Kjo organizatë, ky grup terrorist, për të realizuar qëllimet e veta, e maskon aktivitetin me institucione arsimore, në shëndetësi, media e shoqata të ndryshme. Të gjitha vendet ku ajo vepron përbën një rrezik për sigurinë e atyre vendeve. Por nuk do të lejojmë kurrë që të helmojë marrëdhëniet mes dy vendeve tona”, u shpreh Sentop.
Çështja e gulenistëve ka zënë shpesh vëmendje kryesore në opinionin publik shqiptar, me kryeministrin Edi Rama dhe autoritetet shtetërore të akuzuar për shkelje të të drejtave të njeriut në rastet e depërtimit të gulenistëve në Turqi.
