Automjeti që është gjetur i djegur te “Mbikalimi i Baltzës” është përdorur nga autori i vrasjes së Shkëlzen Kastratit në Fier, këtë mëngjes.
Policia njoftoi se rreth orës 10:30, në vendin e quajtur “Ura e Sheqit”, një shtetas i paidentifikuar, ka vrarë me armë zjarri Kastratin, rreth të 40-tave, i cili ka qënë në automjetin tip “Benz”.
Autori është larguar nga vendngjarja me një automjet tip “Range Rover”, i cili u gjet nga shërbimet e policisë i djegur, te vendi i quajtur “Mbikalimi i Baltzës”.
Nga ana e Policisë janë ngritur pika kontrolli dhe vijon krehja e zonës për të bërë të mundur kapjen e autorit, thanë burime zyrtare.
Ndërkaq, burime nga vendngjarja bënë me dije se pas të shtënave, automjeti i drejtuar nga Kastrati është përplasur me një tjetër makinë në lëvizje.
Dyshohet se Kastrati është qëlluar me dy plumba. Personat e pranishëm në zonë nuk raportojnë të kenë dëgjuar të shtëna, ç’ka shton dyshimet se në atentat është përdorur një armë me silenciator.
