Besnik Mustafaj, anëtar i Komisionit të Përzgjedhjes të kandidatëve për deputet në PD, ish-ministër në Qeverinë Berisha dhe ish-deputet i Partisë Demokratike, është propozuar për anëtar i Këshillit Drejtues të RTSH.
Kjo bazuar në projektvendimin që i është paraqitur Kuvendit për miratim. Në projekt-vendim thuhet se mandati i Mustafajt, nëse do të votohet nga Kuvendi, do të ketë një mandat 5-vjeçar.
Nuk dihet nëse kandidatura e Mustafajt do të miratohet nga Kuvendi ose jo, ndërsa mësohet se emri i tij për të qenë anëtar i Këshillit Drejtues të RTSH është bërë përpara se deputetët e saj të digjnin mandatet e deputetëve.
Pak ditë më parë kreu demokrat Lulzim Basha caktoi Mark Markun, një tjetër anëtar të Komisionit të Përzgjedhjes së kandidatëve si drejtues politik të PD në Qarkun e Lezhës.
Komisioni përbëhej nga 5 anëtarë, mes të cilëve edhe Bujar Nishani dhe Genc Ruli.
