Kryeprokurori Olsian Çela u shpreh se askush nuk i pengon prokurorët që të nisin hetimet në Shqipëri, teksa u pyet nga gazetarët në lidhje me përgjimet e “Ndrangheta-s”, ku dolën emrat e disa zyrtarëve të lartë në vend.
Çela tha se është detyrë e çdo prokurori që të jetë i përgjegjshëm përpara ligjit. Gjithashtu, ai tha se pavarësia e prokurorëve është garanci për sistemin.
“Sot garancia më e madhe që i është dhënë sistemit është pavarësia e prokurorëve dhe askush nuk mund t’i pengojë drejtuesit e prokurorisë të nisin hetimit për çështjet që janë në kompetencën e tyre vendore dhe tokësore. Besoj që përtej garancisë që i është dhënë prokurorëve unë vlerësoj se sot sistemi i prokurorisë ka nevojë për rregullime të vogla ligjore që do të krijonte balancat e duhura me institucioneve. Vlerësoj se kolegjialiteti që ka sot prokuroria në administrim dhe fragmetarizimi i prokurorisë i krijon një dobësim në mënyrën se si funksionon. Detyra e çdo prokurori është të jetë i përgjegjshme përpara ligjit”, tha ai.
