Presidenti i Republikës Ilir Meta nëpërmjet një postimi në rrjetin social “Facebook” ka reaguar për situatën e koronavirusit ne vend.
Referuar të dhënave të publikuara në nga “Zëri i Amerikës”, sipas së cilave numri i të prekurve me koronavirus pas javës së dytë të dhjetorit është rritur, Meta shkruan se për një mirëmenaxhim të pandemisë duhet të ishte krijuar një plan i qartë për përmirësim të kushteve në spitale, ndërsa shton se koronavirusi nuk ndalet me propagandë.
“Sipas të dhënave zyrtare të përpunuara nga ‘Zëri i Amerikës’, numri i të prekurve nga pandemia arriti në 4830, ose 20.4 përqind më shumë se një javë më parë. Ky është niveli më i lartë i shënuar, që pas javës së dytë të dhjetorit. Nevojitet një plan i qartë, që duhet ta kishim prej kohësh, për menaxhimin efikas të situatës, përmirësimin e prekshëm të kushteve në spitale, rritjen e masave mbrojtëse për mjekët e infermierët dhe veçanërisht për vaksinimin e popullatës. COVID-19 nuk ndalet me propagandë. Shëndeti dhe jeta e shqiptarëve duhet të jenë prioritet absolut”, shprehet kreu i shtetit.
