Një person është raportuar i plagosur me armë zjarri këtë të Martë në Vlorë. Mësohet se plagosja ka ndodhur pranë bibliotekës në këtë qytet, ndërsa personi i lënduar është identifikuar si Marjon Mitro. Ai ndodhet në spital jashtë rrezikut për jetën.
“Rreth orës 10:00, në spitalin e Vlorës, ka shkuar i plagosur (dyshohet me armë zjarri, në rrethana ende të paqarta), shtetasi M. M., banues në Vlorë, i cili ndodhet nën kujdesin e mjekëve, jashtë rrezikut për jetën. Gjatë krehjes së zonës, në aksin rrugor Vlorë- Selenicë, nga shërbimet e Policisë është konstatuar duke u djegur një automjet i braktisur i markës “Land Rover”, i cili paraprakisht dyshohet se mund të jetë i autorit të ngjarjes”, njofton policia.
Burime policore thanë se ka dyshimet qe kemi të bëjmë me një atentat. Dyshohet se Mitro po ecte në këmbë kur është qëlluar nga një makinë në lëvizje.
Mitro ka qenë pjesë e dosjes së “tritolit” të Julian Sinanit dhe është dënuar me burg bashkë me anëtarët e tjerë të grupit. Ai dyshohet se ka porositur atentatin e mbetur në tentativë ndaj ish-prefektit të Vlorës, Besnik Dervishi, ndohur disa vjet më parë.
Gati një vit më parë, Mitro ka dalë nga burgu.
