Mediat italiane, në raportimet e tyre, hedhin kritika mbi punën e policisë shqiptare për rastin e zhdukjes së biznesmenit italian Davide Pecorelli në vendin tonë.
Babai i katër fëmijëve kishte ardhur për të bërë biznes në Shqipëri, ndërkohë që në Itali kishte pasur vështirësi së fundmi. Autoritetet italiane kanë marrë në pyetje partneren e tij shqiptare, me të cilën biznesmeni ka një fëmijë.
Ndërsa në Itali është çelur një hetim për vrasje, autoritete shqiptare presin përgjigjet e analizave të ADN-së, së mbetjeve të gjetura në makinën e djegur në Pukë.
Sipas “UmbriaDomani”, nga Italia në Shqipëri është dërguar një kampion ADN-je i vëllait të biznesmenit për të bërë krahasimin.
Gazeta italiane ka rezerva për punën e policisë shqiptare, që e kritikon për vonesën në hetime.
“Ka akoma shumë pyetje që presin përgjigje, si dhe shumë gjëra që policia shqiptare i ka anashkaluar. Si është e mundur që telefoni dhe ora e Davide u gjetën pa dëmtime të veçanta, ndërkohë që makina u shkrumbua plotësisht? Për hetuesit shqiptarë, zjarri ka qenë aksidental, por ajo nuk shpjegon shkakun e zjarrit. Tezat e hetuesve vendas nuk janë aspak bindëse, ka ende shumë pyetje për zhdukjen e Davide, që është gjithmonë e më shumë një mister që nuk bind familjarët e tij”, shkruan gazeta italiane.
