Një gomone është gjetur e braktisur në det në fshatin Delisuf të njësisë administrative Novoselë.
Mjeti lundrues dyshohet se është përdorur për trafikun e 55 klandestinëve në Vlorë pasi është gjetur pranë vendit ku ata u nisën.
Policia ka mbërritur në vëndngjarje dhe po kontrollon zonën.
Me 8 janar 2021 u shpëtuan 55 emigrantë nga vende të ndryshme të Lindjes së Mesme pasi mbetën të bllokuar për më shumë se 3 orë në mes të detit.
Për këtë ngjarje ndodhet në burg 26-vjeçari, Emiljano Likaj, i dyshuar si skafisti që do ti transportonte drejt Italisë.
Ai u vu në pranga 12 ditë pas tentativës së trafikut që rrezikoi të prodhojë një tragjedi, pasi gomonia mbeti në det të hapur për rreth 3 orë.
26-vjeçari Likaj, por dhe të paktën dy persona të tjerë, që sipas burimeve ishin në rolin e skafistit, arritën t’i shpëtojnë arrestimit gjatë operacionit të shpëtimit të ndërmarrë nga Roja Bregdetare.
Mënyra se si ata arritën të dalin në breg mbetet e paqartë dhe ka ngjallur dyshime se skafistët mund të edhe të jetë ndihmuar nga persona brenda operacionit.
Për të arritur në brigjet e vendit fqinj, klandestinët, sipas burimeve, paguanin nga 4 deri në 5 mijë euro, ndërsa në ndihmë të kësaj veprimtarie ishte krijuar edhe një infrastrukturë e plotë.
Deri më tani, policia ka zbuluar të paktën dy baza të strehimit të emigrantëve, një hotel në Tiranë dhe një shtëpi në fshatin Trevllazër në Vlorë.
Të dyshuar si pjesë e këtij rrjeti, dhe të akuzuar për strehimin e emigrantëve janë tashmë në qeli 31-vjeçari nga Vlora Qazim Ismailaj dhe Fatos Tusha nga Tirana.
