Nga Enton Laska
Para 10 ditësh me mijëra hektarë tokë bujqësorë dhe banesa në Shkodër, Lezhë, Kurbin e Fushë-krujë dhe zonat e jugperëndimit ishin në pushtetin e ujit.
Nuk kishte se si ndodhte ndryshe, teksa justifikimi i qeverisë ishte se këtë herë përmbytjet ishin më pak se në 2009 dhe 2010, a thua se qeverisë i kërkohet vetëm të mbajë statistika.
Ndoshta kishim më pak sipërfaqe nën ujë, por kujtojmë se këtë herë ishin vetëm 3 ditë reshje dhe jo tre jave si para 10 vjetësh, ndaj kjo qeveri duhet t’i japë fund fyerjes së inteligjencës.
Tre ditë reshje shiu mjaftuan për të nxjerrë në pah brishtësinë e institucioneve tona për të menaxhuar situatën e përmbytjeve.
Shërbimi meteorologjik ushtarak ka njoftuar se priten reshje intensive shiu në datat 22 deri 26 janar, ndërkohë që reshjet kanë filluar që ditën e sotme.
Sot që po flasim i kërkoj qeverisë shqiptare, kryesisht Ministrisë Mbrojtjes, Ministrisë Infrastrukturës dhe Emergjencave Civile, Bordit Rajonal të Kullimit të na japë informacion se çfarë masash janë marrë për të evituar dëmet e përmbytjeve?
A ka dalë bordi i kullimit në veri të vendit këto ditë në terren për pastrimin dhe zgjerimin e kanaleve kulluese në zonat fushore?
Kujtojmë se mospastrimi dhe mos-zgjerimi i kanaleve kulluese në kohë ka rezultuar me përmbytjen e dhjetra hektarë tokë në Shkodër, Lezhë e Kurbin, ku me dhjetra fermerë u penalizuan. Gjithashtu kujtojmë se shumë prej mbetjeve të pallateve të shëmbura në Kurbin janë hedhur buzë kanaleve kulluese dhe në basenet e Matit apo Drojes.
A janë marrë masa për shkarkime të kontrolluara nga HEC-et e Vaut të Dejës, Shkopetit dhe të Ulzës, pasi prurjet e shumta nga këto HEC-e shkaktojnë përmbytje masive në Kurbin e Lezhë? A po presin ti hapin portat kur të ngjitet niveli në pikën kritike!
A janë marrë masa për riparimin e argjinaturave përgjatë zonave të ndryshme të lumit Mat dhe Drojë?
A janë kolauduar hidrovorët, OSHEE a i ka marrë masat për efiçencën e linjave përgjatë ditëve me reshje?
A ka ARRSH një list të akseve rrugore që përbejnë rrezik për kalimin e mjeteve, siç është aksi i vjetër rrugor Milot –Rubik psh, që është shembur dhe ku fati shmangu një tragjedi para ca ditësh?
A janë marrë masat për të furnizuar me ushqim për blegtorët të cilët do të preken nga përmbytjet që pritet të ndodhin?
Si qytetar i Kurbinit i kërkoj Bashkisë Kurbin të jenë transparent mbi çfarë masash kanë marrë për mijëra familje që janë të prekura nga tërmeti i 26 nëntorit dhe që prej një viti jetojnë në çadra apo konteiner.
A ka një plan masash për vendosjen e këtyre familjeve në magazinat e braktisura shtetërore, a ka një plan masash për furnizimin e tyre me ujë dhe ushqim?
Ka ardhur koha që Shteti Shqiptar të fokusohet edhe tek parandalimi, pasi situata e përmbytjeve nuk është e njëjtë sikurse paraqitet në videot 3D apo inspektimet në ERTV të kryeministrit tonë.
Nuk është parapërgatitje t’u thuash shqiptarëve që priten reshje shiu e të lutemi të mos jenë intensive.
Përgatitje është t’u tregosh çfarë plani ke për parandalimin e përmbytjes së tokave bujqësore, a do kenë dëmshpërblim për përmbytjet e para pak ditëve, a do t’u subvencionohen këstet e kredive, duke qenë se prodhimi i tyre ka shkuar dëm.
Ditët e përmbytjeve kam vizituar shumë prej zonave të ndryshme në Kurbin dhe pa frikë mund t’ju them se situata është e rëndë dhe qytetarët janë në mëshirë të fatit.
