Ministrja e Shëndetësisë, Ogerta Manastrirliu ka bërë me dije se në 14 ditët e fundit janë rritur rastet e infektimit me Covid dhe pacientëve që marrin mjekim në spitale.
Manastrirliu tha se rritja ka ardhur nga grumbullimet që kanë ardhur si pasojë e festave të fundvitit gjatë të cilave, sipas saj, se ka pasur grumbullime familjare.
“Rastet e reja kanë shënuar rritje me 260 raste në 14 ditët e fundit. Kemi një rritje të numrit të rasteve në bashki, duke u rritur numri i bashkive ku ka raste të reja, nga 44 në 50 bashki. Është shënuar rritje e rasteve edhe te shtrimet në spitalet Covid, por një rritje e qëndrueshme, jo alarmante. Por është një situate që tregon se duhet të kemi një kujdes të shtuar për të parandaluar një rritje të mëtejshme. Në 14 ditët e fundit ka pasur me një mestarare prej 273 shtrimesh. Ndërsa në terapi intensive ka pasur rritje mesatarisht nga 31 në 33 pacientë”, tha mes të tjerash ministrja në një deklaratë për mediat.
Ndërkohë, shefja e Departamentit të Epidemiolgojisë dhe Kontrollit të Sëmundjeve Infektive në Institutin e Shëndetit Publik, tha se gjatë 2 javëve të fundit, është vënë re një rritje e infeksioneve të reja, sidomos në grupmoshën 15-24 vjeç.
