Aktorja e njohur e humorit, Lisa Kujofsa, ka treguar arsyet se pse u largua nga spektakli i humorit ‘Klanifornia’.
Në një intervistë për “ABC-ja e mëngjesit”, Lisa tregoi se vendimi për t’u larguar u mor për shkak të mungesës së publikut në spektakël, pas rregullave të vendosura si masë për të parandaluar Covid. Ajo shtoi se arsyeja kryesore lidhet me dëshirën për të qëndruar në shtëpinë e saj dhe për të respektuar masat anti-Covid.
“‘Klanifornia’, si të gjitha spektaklet me publik, nuk ka më publik dhe që këtu filloi një mangësi, një ftohtësi. Shfaqjet që janë në publik, duan reagimin e menjëhershëm, sidomos kur bën humor dhe kur reagimi mungon është vrastare, është shumë e vështirë. Arsyeja kryesore ishte që doja të isha në shtëpinë time dhe doja të isha larg një papërgjegjshmërie masive shqiptare përkundrejt situatës ku ndodhemi. Nuk kam as frikë as turp ta them. Më vjen keq për këtë situatë”, u shpreh aktorja.
Së fundmi, aktorja ka hapur një kanal në YouTube ku poston imitime dhe skeçe të ndryshme.
