Kryetarja e Dhomës së Përfaqësuesve, Nancy Pelosi fjalën e saj në debatin për fajësimin e presidentit Donald Trump e ka nisur duke thënë se ai është një rrezik i qartë dhe i pranishëm për vendin.
“Ne e dimë që presidenti i Shteteve të Bashkuara nxiti këtë kryengritje, këtë rebelim të armatosur kundër vendit tonë të përbashkët. Ai duhet të shkojë, ai është një rrezik i qartë dhe i pranishëm për kombin që të gjithë e duam”, tha Pelosi.
Mediat vendase bëjnë me dije se ndër të tjera Pelosi ka theksuar se presidenti amerikan ka gënjyer në mënyrë të përsëritur për rezultatin e zgjedhjeve në nëntor dhe ka hedhur dyshime për demokracinë.
“Pastaj erdhi ajo ditë zjarri që të gjithë ne përjetuam. Presidenti duhet të fajësohet.Unë besoj se Presidenti duhet të dënohet nga Senati, një ilaç kushtetues që do të sigurojë që republika do të jetë e sigurt nga ky njeri i cili është kaq i vendosur për të shkatërruar gjërat që i duam dhe që na mbajnë së bashku”, ka thënë ndër të tjera ajo.
