Policia e Kukësit ka informuar në lidhje me konfrontimin që efektivët blu kanë pasur me ish-kreun e këshillit të qarkut, Abedin Oruçi, ditën e djeshme.
Në njoftim, thuhet se policia ka zhvilluar një operacion për kapjen e Oruçit që më herët ishte shpallur në kërkim. Në momentin që efektivët kanë hyrë në lokalin në pronësi të Oruçit kanë hasur barrierën e të afërmve të tij.
Duke përfituar nga ky fakt dhe duke i kanosur me armë zjarri punonjësit e Policisë, Oruçi ka mundur të largohet.
Si pasojë policia ka arrestuar 6 persona (të afërm të Oruçit), nën akuzën “Kundërshtimi i punonjësit të policisë së rendit publik”.
“E. O., 32 vjeç, G. O., 34 vjeç, B. M., 35 vjeç, E. M., 18 vjeç, Z. Sh., 19 vjeç dhe B. D., 48 vjeç, banues në Kukës, për veprat penale “Kundërshtimi i punonjësit të policisë së rendit publik” kryer në bashkëpunim dhe “Veprime që pengojnë zbulimin e së vërtetës””, thuhet në njoftimin e policisë.
