Vendi i parafundit në renditje në Konferencën e Perëndimit me 3 fitore dhe 6 humbje në 9 ndeshjet e luajtura deri më tani kanë sjellë një revoltë te lojtari lider i ekipit të Houston Rockets, James Harden.
Përpara fillimit të sezonit, mediat amerikane raportonin se Harden nuk donte të rikthehej më një skuadër por në fund situata nuk gjeti zgjidhje dhe ai nisi sezonin me Rockets.
Gjithsesi, e ardhmja e tij në këtë skuadër nuk duket e gjetë pasi vetë basketbollisti nuk sheh “dritë në fundin e tunelit” duke i lëshuar sinjale organizatës për ta lënë atë të lirë.
“Nuk jemi mjaftueshëm të fortë. Unë kam bërë maksimumin tim, më të mirën e mundshme. E dua këtë qytet, por situata është jashtë kontrollit. Një çmenduri, nuk mendoj se kjo situatë mund të zgjidhet”, tha James Harden.
Më tej, “mjekra” shton: “Flas për veten time, nuk dorëzohem kurrë edhe pse ky fillim-sezoni është i vështirë. Në këto rezultate kanë ndikuar edhe mungesat e shumta apo protokolli anti-Covid i NBA-së”.
“Kam punuar fort për të qenë sa më kompetitiv, po ashtu edhe të tjerët. Nëse jemi të gjithë nga e njëjta anë, atëherë situata mund të ndryshojë. Gjithsesi, kur ke disa shokë skuadre që nuk besojnë, atëherë bëhet e vështirë”, tha Harden.
