Komisioni i Pavarur i Kualifikimit ka shkarkuar nga detyra prokurorin e Apelit në Vlorë, Pelivan Malaj.
Trupi gjykues i kryesuar nga Lulzim Hamitaj, me relatore Pamela Qirkon dhe anëtare Valbona Sanxhaktarin, e njoftoi vendimin këtë të Hënë, pas senacës dëgjimore që u zhvillua më 6 Janar.
Në senacë dëgjimore u lexua raporti i ILDKPKI, sipas të cilit, Malaj kishte kryer deklarim jo të saktë për pasuritë, nuk kishte burime të ligjshme për justifikimin e tyre dhe se kishte kryer fshehje dhe deklarim të rremë.
Pelivan Malaj e ka nisur karrierën në sistemin e drejtësisë si avokat. Në periudhën 1998-1999 ai ka punuar si prokuror në Prokurorinë e Rrethit Gjyqësor Vlorë. Në maj 2003, Malaj është emëruar prokuror i Prokurorisë së Apelit Vlorë, detyrë të cilën e ka ushtruar për gati dy dekada. Gjithashtu ai ka qenë kryetar i Shoqatës së Prokurorëve.
