Janari duket se është muaji ku socialisto-rilindasit harbohen, festojnë, dëfrehen, ndërsa shqiptarët përballen me tragjedi, ose vuajnë pasojat qofshin këto natyrore apo të papërgjegjshmërisë.
Në 9 janar 2004, kur ndodhi ajo që njihet si një nga tragjedi më të rënda, ku 28 shqiptarë u mbytën në Adriatik teksa tentonin të shkonin drejt Italisë me gomone, Kryeministri socialist i asaj kohe, Fatos Nano, festonte në një nga buzuqet e Greqisë.
Në atë kohë ngjarja shkaktoi reagime të forta, ndërsa Nano vijoi vizitën në Greqi dhe agjendën e tij private.
17 vjet më pas, po në janar, një grup socialisto-rilindas, zgjodhën të darkojnë në një prej restoranteve luksoze të Dubait.
Pamjet e darkës mund të mos zbuloheshin kurrë, sikur vetë restoranti të mos postonte në rrjetet sociale, videon ku shfaqeshin mes klientëve, në një prej ambienteve private të lokalit, dy ministra, Arben Ahmetaj dhe Belinda Balluku, nënkryetari i Bashkisë së Tiranës, Arbjon Mazniku, dhe Endri Fuga, këshilltar i gjithanshëm i Edi Ramës. Me to ishte edhe biznesmeni Samir Mane.
Ndërkohë në anën tjetër janë ato qindra familje që po kalojnë dimrin e tretë të çadrat dhe presin shtëpitë që do ndërtohen, janë ato mijëra njerëz që përballen me krizën e shkaktuar nga pandemia e Covid-19, dhe nga përmbytjet e ditëve të fundit.
Pak a shumë dy pamje të njëjta: në njërën anë festohet dhe harbohet mes luksit, në anën tjetër njerëz që vuajnë tragjedi dhe pasoja.
