Nga reshjet e dendura të shiut në dy ditët e fundit, më problematike situata paraqitet në veri të vendit, ku ka pasur rrëshqitje dherash, shembje rrugësh dhe përmbytje.
Këshilltari i Presidentit të Republikës për Emergjencat Civile, Shemsi Prençi tha se dëmtimet e rrugëve nga reshjet e shiut faktuan se punimet, që janë kryer në rrugë, kryesisht ato të viteve të fundit nuk kanë qenë cilësore.
Ai tha se shembjet e rrugëve kanë ndodhur pasi kanalet e sipërme kulluese janë lënë pas dore dhe nuk janë pastruar.
“Është fatkeqësi që në të gjitha to vende ku ka pasur i investime në vitet e fundit doli në pah cilësia e dobët e punimeve. Në të gjitha rastet, rrëshqitja ka ardhur për shkak të punimeve të dobëta. Kanalet kulluese në pjesë e sipërme të rrugës janë të pa pastruara. ARRSH, si përgjegjësi kryesor nuk ushtron autoritetin ligjor në raport me detyrimet që kanë kompanitë për mirëmbajtjen e segmenteve rrugore”, tha ai i ftuar në “Euronews Albania”.
Për të përballur situatën e përmbytjeve dhe vërshimin e ujërave Prençi tha se duhet të ketë një aksion mbarëkombëtar, përmes të cilit të bëhet e mundur garantimin i deltave të lumenjve dhe pastrimi i thellë i kanaleve kulluese.
“Do t’i duhet Shqipërisë me patjetër për një aksion mbarëkombëtar për garantimin serioz të deltave të lumenjve, të kanaleve kulluese dhe mbajt pastaj nga bashkitë dhe bordet e kulluese pastrimit periodik”, u shpreh ai.
Ai shtoi se qeveria shqiptare nuk e ka marrë seriozisht paralajmërimin e bërë nga Instituti i Gjeoshkencave (IGJEUM) se vendi ynë do të përfshihet nga reshje të dendura shiu.
“Jo gjithmonë fajin e ka natyra. Shirat e fundit janë paralajmëruar në mënyrë të hershme nga IGJEUM nga data 30 dhjetor u dha paralajmërimi se Shqipëri do të përfshihet me shifra me intensitet të lartë duke filluar nga 6-12 janar”.
“Në datën 5 IGJEUM e dhe alarmin në rrugë zyrtare duke dërguar buletinin informativ në të gjitha instancat shtetërore. Për herë të parë dje janë parë zyrtarët e qeverisë që të flasin për këto probleme, sepse nuk kishin folur më parë, sepse nuk e vlerësuan alarmin e IGJEUM”, tha Premçi. Më herët ai ka mbajtur postin e kreut të Emergjencave Civile, post të cilin aktualisht e mban Haki Çako.
