Bashkia e Shkodrës ka dalë me një apel për banorët që banojnë në zona të rrezikuara nga përmbytjet.
“Nisur nga monitorimi dhe verifikimi në terren i përkeqësimit të situatës së rritjes së nivelit të ujërave në lumIn Drin, lumin Buna dhe në Liqenin e Shkodrës, Bashkia Shkodër lajmëron të gjithë banorët në zonat e rrezikuara nga përmbytjet në njësitë administrative Ana e Malit, Dajç, Bërdicë, Velipojë, Rrethina, Guri i Zi, Shkodër, që të marrin masa për sigurimin e gjësë së gjallë, prodhimeve bujqësore, mjeteve dhe pajisjeve të ndryshme që mund të dëmtohen”, apelon bashkia.
Burime zyrtare bëjnë me dije se strukturat e Emergjencës Civile në Bashkinë Shkodër janë në nivel gadishmërie dhe në shërbim. Strukturat monitoruese të situatës hidrike në nivel vendor do të njoftojnë për ndryshimet në matjen e kuotës së lumenjve dhe liqenit. Strukturat vendore po komunikojnë në vazhdimësi me të gjitha strukturat në Qendrën Kombëtare të Mbrotjes Civile përmes Prefekturës Shkodër.
Bashkia Shkodër do të vijojë sot me furnizimin me ujë të pijshëm në njësitë Ana e Malit dhe Dajç.
