Kukësi ka vijuar përgatitjet për ndeshjen kundër Laçit, ku verilindorët pretendojnë me patjetër rezultat pozitiv, pse jo, fitore. Trajneri Rraman Hallaçi e ka marrë me shumë seriozitet dhe përgjegjësi punën dhe ka kërkuar përqendrim maksimal e shumë punë prej lojtarëve. Kukësi kërkon kthesën, ndaj Laçi shikohet si kundërshtari i duhur, pasi edhe në fazën e parë trepikëshi i parë u mor kundër kurbinasve, sukses që u pasua nga disa fitore radhazi. Nëse Hallaçi po punon me skuadrën, është drejtori Nexhipi që po punon intensivisht për ta përforcuar ekipin në këtë periudhë merkatoje.
Stenio Zhunior ishte objektiv i kuksianëve, por Partizani i bëri “stërkëmbës”, pasi ia rrëmbeu brazilianin Kukësit. Gazeta mëson se 29-vjeçarin e bindi Ilir Daja dhe Bozhiqi, të cilët ia ndryshuan mendjen dhe destinacionin futbollistit. Ata mposhtën konkurrencën e Kukësit, edhe pse shkesë që ai të mbërrinte te Kukësi kishin hyrë kapiteni Agim Ibraimi dhe një tjetër ish-shok skuadre me të, pikërisht Besir Demiri.
Me dështimin për afrimin e Zhuniorit, Kukësi është hedhur në sulm për një futbollist tjetër në rolin e tij, por edhe për një mbrojtës qendre. Sakaq, ka bërë kërkesë për largim nga skuadra Entonio Elezaj, pasi “gardiani” nuk ka pasur hapësirë për të luajtur. I mbetet në dorë klubit që të vendosë se çfarë do të bëhet me portierin.
/Panorama sport/
