Kukësi nuk po kalon një moment të mirë. Verilindorët nuk njohin fitore prej 4 ndeshjesh radhazi duke marrë 3 humbje e një barazim, ndërsa nga skuadra u largua edhe trajneri Skënder Gega. Vendin e tij, Kukësi ia ka besuar Rrahman Hallaçit e në një intervistë për “RTSH Sport”, presidenti i nderit, Safet Gjici ka folur për ecurinë e skuadrës, por edhe për trajnerin e ri.
“Kukësi ka një ekip shumë të mirë dhe fillimisht gjithë analistët thanë që u shkatërrua Kukësi. Kemi zhvilluar lojëra të mira dhe më vjen shumë keq për Gegën pasi nga të gjithë trajnerët që kanë qenë këtu, ka pasur shumë përgjegjësi. COVID e preku dhe këtu pati probleme, unë them se ekipi është aty”.
Hallaçi? “Klubi e ka parë të arsyeshme se Hallaçi është më i përshtatshmi, ku ta gjejmë një trajner kuksian të ketë rezultate. Të shkojë deri në fund dhe të dalë kampionë, ne nuk lëvizim nga objektivi. Nëse klubi dhe specialistët e shikon se ka nevojë për merkato, pse të mos e bëjmë. Klubi i Kukësit i ka plotësuar gjithnjë kërkesat stafit teknik dhe ne tani duam rezultate, duam fitore, duam titullin. Fitorja e titullit të vijë me stadiumin e ri dhe kjo do të ishte qershia mbi tortë. Kështu, kuksianët do të kenë titullin e dytë dhe stadiumin”.
Stadiumi i Kukësit? “Pandemia nuk na lejon të parashikojmë se ka goditur çdo fushë, por prapë së prapë ne kërkojmë fondet që stadium të mbarojë dhe të mbarojë mirë madje”, u shpreh Gjici.
