Nga BoldNews.al
Çdo derë në Bruksel apo e homologëve të Evropës Përëndimore është e mbyllur për Ramën, jo sot, por për gati katër vite radhazi, megjithatë ai e gjen një shteg, e ka një udhë, atë drejt Turqisë. Më shumë ka udhëtuar Rama drejt shtetit turk, sesa një tregtar rrobash i tregut çam, që puna ia do të sigurojë mallin në atë vend.
Sot kryeministri ynë ndodhet në Ankara, në një vizitë miqësore, zyrtare, për sevap fakir, harem birinxhi apo pazar lezet… Aty ka gjetur strehën sa herë ndihet keq, duke e cilësuar presidentin turk Rexhep Taip Erdogan, kardash (vëlla) e shkuar vëllait. Si mirënohje ngremë memoriale në mes të Tiranës për ushtarët e rënë turq në të ashtëquajturin grusht shteti, dorëzojmë si “pako postare” ndonjë individ i cili dyshohet i lidhur me organizatën “Feto”, atë që Erdogan e quan organizatë terroriste. Po çdo ndihmë e ka një haraç, që kryeministri ynë nuk e ka për gjë ta japë. Për të ja vlen…
Qeveria turke do të ndërtojë 522 banesa në Laç dhe prej pak ditësh ka nisur puna. I gjithë projekti kushton rreth 42 milionë euro dhe është donacion i plotë. Padyshim që kjo është një nismë serioze, një ndihmesë fort e madhe, duke marrë në konsideratë se shumë njerëz që kanë humbur banesat që nga 26 nëntori 2019 kanë dëgjuar vetëm premtimet dhe projektet haluçinative 3D të Ramës dhe nuk kanë parë një tullë të vendosur për shtëpinë e tyre.
Buxheti shtetëror, që nuk është gjë tjetër përveçse taksë e rënduar e qytetarëve, shpesh ka firuar. Është tretuar nga abuzimet me konçesionet, me bojatisjen e qendrave të qyteteve, me tenderat e tejfryrë të Ministrisë së Shëndetësisë apo edhe me krijimin e luksit për institucionet qeveritare dhe shtëtërore. Nevoja është e madhe për investim dhe rindërtim, por kur kryeministri konstaton arkën bosh, niset me një “mision” të njohur, atë të lypjes nëpër botë.
“Vjedhja është turp”-ka mbetur si moto e kahershme e qytetarëve të mirë që injektojnë me këtë frymë fëmijët në rritje. Për qeverinë vetëm turp nuk quhet, përkundrazi e konsiderojnë si meritë dhe ndërsa vjen çështja për të përballuar situata të vështira, duket qartësisht se i “zoti i shtëpisë” i ka prishur kursimet dhe në fund detyrohet të kërkojë “lëmoshë” nëpër “fqinj”, qofshin ata edhe disi larg në Turqi.
“Kur vjen puna për Shqipërinë, jam njësh për të lypur”-kështu deklaroi një javë më parë kryeministri Rama, duke iu përgjigjur interesit për çështjen e vaksinës anti-Covid. Por kjo lypje nuk vjen sepse nuk ka para buxheti i shtetit, por është abuzuar deri në qindarkën e fundit.
Megjithatë shfaqja vazhdon. Sa për propagandë kryeministri shfaqet me çitjane dhe pelerinën e zezë që kushton më shumë se 3000 euro dhe ky “lypsar” modern, nuk e ka problem që të gjezdisë nëpër dyqane të shtrenjta në Amerikë, të krijojë luksin për taborrin e tij që vuajnë nga sëmundja e pashërueshme e babëzisë dhe në fund i mbetet krekosja se di të lypë. Edhe lëmosha ka një kufi, ndonëse shpesh në këto tetë vjet është kapërcyer përtej çdo imagjinate, edhe në haluçinacionet më të mira të një njeriu të bromosur me Rilindjen. Rama do mbërrijë nga Turqia, por me kokën pas, për ta vizituar sërish, për çdo arsye, qoftë ajo edhe për një Pazar lezet, edhe pse në këtë situatë është batakçillëk!
