Juventusi është në kërkim të një sulmuesi qendre dhe mes të piketuarve është edhe Fabio Quagliarella i Sampdorias.
37-vjeçari është në formë shumë të mirë dhe “Zonja” e sheh si një zëvendësues perfekt të Moratës, i cili është i vetmi qendërsulmues tipik në skuadrën bardhezi.
Në lidhje me këto raportime ka folur trajneri i Sampdorias, Claudio Ranieri. Ai shprehet se nuk e di sesi do të mbyllen tratativat, por do të ishte një arritje e madhe nëse rikthehej te Juventusi në këtë moshë.
“Lexova sot për mundësinë e kalimit të Quagliarellës te Juventusi. Sigurisht do të ishte një shpërblim i madh për të, pavarësisht fatit të këtyre tratativave. Të mbushësh 38 vjeç në fund të janarit dhe të thirresh nga një ekip kaq i madh, sigurisht që të kënaq. Do presim dhe do shikojmë”, u shpreh Ranieri.
