Argjentina është shteti më i madh në Amerikën latine që legalizoi abortin, një triumf për lëvizjet feministe të cilat kanë lobuar prej kohësh.
Legjislacioni garanton abortin deri në javën e 14-të të shtatzënisë dhe më tej në rastet e përdhunimit ose kur shëndeti i një gruaje është në rrezik.
“Aborti i sigurt, i ligjshëm dhe falas është I ligjshëm,’’ shkroi Fernández në Twitter pas votimit, duke vënë në dukje se kishte qenë një premtim zgjedhor.
Jashtë Senatit, aktivistët pro dhe anti-abort u mblodhën, me mbështetëset kryesisht femra. Turma shpërtheu në brohoritje dhe përqafime, ndërsa zv.presidentja Cristina Fernandez de Kirchner, e cila kryesoi debatin, shpalli rezultatin duke thirrur “abort legal në spital!”
Lëvizja feministe e Argjentinës ka kërkuar abort legal për më shumë se 30 vjet. Mbështetësit citojnë shifra zyrtare që pretendojnë se më shumë se 3,000 gra kanë vdekur nga abortet klandestine në vend që nga viti 1983.
Kundërshtarët e projektligjit thanë se ky vendim nuk përfaqëson shumicën. Megjithatë legjislacioni lejon që profesionistët shëndetësorë dhe institucionet private mjekësore të heqin dorë nga procedura. Por do të kërkohet që ta referojnë gruan në një qendër tjetër mjekësore. /APnews
