Kapiteni i Barcelonës Lionel Messi, shpreson që një ditë të luajë në Shtetet e Bashkuara, por nuk është ende i sigurt për të ardhmen e tij, pasi kontrata t’i mbarojë në muajin qershor.
Sulmuesi 33-vjeçar mund të fillojë negociatat me klubet e huaja në janar, ndërsa spekulimet mbi të kanë qenë intensive që kur ai dorëzoi një kërkesë transferimi në gusht.
“Unë akoma nuk e di se çfarë do të bëj. Do të pres deri sa të mbarojë sezoni. Unë do të doja të luaja në Shtetet e Bashkuara dhe të përjetoja jetën dhe kampionatin atje, por në fund të fundit do të kthehem në Barcelonë me një farë kapaciteti”, u shpreh Messi për kanalin televiziv spanjoll La Sexta.
“Tani për tani gjëja më e rëndësishme është të përqendrohemi te skuadra dhe të përfundojmë sezonin mirë, të përqendrohemi në përpjekjen për të fituar trofe dhe të mos shpërqendrohemi nga gjërat e tjera”, shtoi argjentinasi.
Barcelona, e cila nuk fitoi një trofe sezonin e kaluar, është e pesta në La Liga pas fillimit të tyre më të keq në një kampionat në ligë në 33 vjet.
Kërkesa e futbollistit për të lënë Barcelonën pasoi përplasjet me presidentin e klubit Josep Maria Bartomeu, i cili dha dorëheqjen në tetor.
