Teuta dhe Tirana ndajnë nga një pikë në javën e 11-të të Superligës, duke mos shkuar më shumë se barazimi 1-1 në “Niko Dovana”. Një sfidë e shoqëruar nga rrebeshi I shiut dhe kushte aspak të mira të terrenit që ndikoi jo pak në lojë dhe rezultat.
Gjithsesi, ndeshja nisi menjëherë me gol. Pa u plotësuar minuta e tretë Grent Halili suprizoi të zotët e shtëpisë, duke dërguar topin në rrjetë pas shërbimit që i bëri Muçi me asistin e tij. Epërsia e shpejtë e bëri malore misionin e të besuarve të Martinit, që provuan të reagonin për të kthyer ekuilibrat në shifra.
Por me Tiranën në mbrojtje të avantazhit dhe fushën aspak optimale, vendasit nuk arritën të kalojnë portierin Bekaj në pjesën e parë.
Me rikthimin në fushë, bardheblutë e Nevil Dede kishin vetëm një synim. Mbrotja rezultatit dhe goditja me kundërsulm. Nga ana tjetër topi qëndroi gjatë në këmbët e futbollistëve të Teutës që pas shumë përpjekjesh barazuan shifrat në minutën e 70-të. I hedhur në fushë si zëvendësues, Dejvid Kapllani ndali topin në rrjetë për të ndezur sërish shpresat e të zotëve të shtëpisë për fitore.
Për këtë, Martini spostoi të gjithë skuadrën e tij në sulm, por në fund duhej të kënaqej vetëm me barazimin. Kjo pikë nuk është për t’u hedhur për Teutën, që ngjitet në vendin e tretë të renditjes me 2 pikë më pak se Partizani i vendit të dytë. Ndryshon diskutimi për Tiranën, e abonuar me barazimet në tre javët e fundit, që kanë zbritur kampionët në fuqi në vendin e gjashtë të klasifikimit.
