Bajerni i Mynihut është i njohur prej kohësh për afrimin e ish-lojtarëve të tij në skuadër. Një shembull konkret është ai i Oliver Kahnit që më 1 janar të 2022-shit do të marrë vendin e Karl Hainc Rumeiges që është CEO i kampionëve të Gjermanisë. Në deklaratën e dhënë për “Az” numri dy i klubit bavarez u shpreh se do të mirëpriste një rikthim të ishmesfushorit gjerman në Mynih.
“Bastian ka qenë një lojtar i rëndësishëm për ne, një njeri i mrekullueshëm. Por për momentin ai nuk jeton në Gjermani dhe një rikthim i tij këtu ka shumë pak gjasa të vijë menjëherë. Të shohim se çdo të ndodhë në të ardhmen. Në futboll nuk i dihet asnjëherë, gjërat ndryshojnë shumë shpejt”, tha Kalle.
Vetë Shvainshtaiger në një prononcim për “Bild” pak kohë më parë u shpreh se e shihte veten në një ditë në rolin e drejtuesit te Bajerni. “Bajerni ka qenë shtëpia ime për pjesën më të madhe të karrierës sime si futbollist. Familja ime jeton aty, ashtu si dhe shumë miq të tjerë. Nuk e di çfarë do të ndodhë në të ardhmen por një ditë mund ta mendoj një rikthim në Mynih”, tha kampioni i botës me Gjermaninë në 2014-ën. Momentalisht gjermani jeton me familjen në Çikago në Shtetet e Bashkuara të Amerikës. Lojtari i dha fund karrierës si futbollist, pikërisht në “MLS”.
Tifozët bavarezë ëndërrojnë që një ditë, Shvainshtaiger të rikthehet në ish-skuadrën e tij dhe të marrë një rol drejtuesi, ashtu siç bëri Oliver Kahn. Për ta(tifozët) klubi duhet të drejtohet vetëm nga njerëz që kanë ADN-në e Bajernit. Një kandidat tjetër për të marrë vendin e lënë bosh nga Oliver Kahn është edhe ish-kapiteni bavarez, Filip Lahm i cili është tërhequr prej disa vitesh nga futbolli i luajtur.
