Eduart Rroca po shkëlqen në sezonin e tij të parë në futbollin turk. 27-vjeçari la Kukësin në verë dhe u bashkua me Istanbulspor dhe duket se ky ka qenë vendimi më i mirë i mundshëm për anësorin nga Librazhdi.
Sot Rroca ka arritur të gjejë rrugën e rrjetës me një gol shumë të bukur nga jashtë zone në ndeshjen në transfertë ndaj Boluspor, e vlefshme për javën e 16 të Ligës së Parë turke.
Ish-sulmuesi i Kukësit e Luftëtarit arriti të tundë rrjetën në minutën e 44-t. Ky ishte goli i 5-të i Rrocës në kampionat në 11 ndeshje, teksa numëron edhe 5 asiste.
Performancat e tij pozitive me klubin turk kanë tërhequr vëmendjen e trajnerit të kombëtares, Edy Reja, që raportohet e ka në vëzhgim futbollistin.
