Ryan Mason, ish-futbollist anglez, u tërhoq para kohe nga futbolli në moshën 25-vjeçare, pas një frakture në kokë, në vitin 2017.
Në ndeshjen Hull-Chelsea, e vlefshme për Premier League, blerja më e shtrenjtë e Hullit pati një përplasje kokë më kokë me Gary Cahill, që i shkatërroi karrierën. Që nga ajo kohë, anglezi mundohet të ndërgjegjësojë mbi rreziqet e goditjeve në kokë në sportin më të dashur në botë.
Në deklarata për BBC, ish-lojtari parashikoi se shumë shpejt nuk do të shohim më goditje me kokë: “Nuk do të habitesha nëse brenda 10-15 vitesh nuk do të ketë më goditje dhe gola me kokë”.
“Futbollistët nuk e kanë shumë të qartë rrezikun që i kanoset. Sa më shumë të edukohen mbi këtë çështje, aq më mirë do të jetë për shëndetin e tyre”, shtoi Mason.
Edhe këtë sezon ka pasur një përplasje të fortë me kokë në Premier League, me protagonistë David Luiz dhe Raul Jimenez. Meksikani ra pa ndjenja në tokë dhe u dërgua në spital me një frakturë në kafkë. Sulmuesi meksikan u operua me sukses dhe është jashtë rrezikut, ndërsa klubi nuk ka dhënë datë për rikthimin e tij në fushë. /a2news
