Nënkryetari i LSI, Petrit Vasili thotë se kryeministri Edi Rama është pro serb. Në një dalje për mediat, si reagim pas deklaratave të Ramës, numri dy i LSI u shpreh se vetëm një armik mund ta quajë Kosovën vend fqinj.
“Rama anti shqiptar që nxin kur takohet me udhëheqësit kosovarë, është i egër me ta, por ngazëllen kur takon Vuçiçin dhe të tjerë udhëheqës serb. Një Kosovë pro shqiptare që i rreh zemra për shqiptari dhe një pro serb që i rreh zemra në Beograd”, tha Vasili.
Sipas Vasilit, Rama po përpiqet të vendosë sa më shumë pengesa për Kosovën në vend të urave lidhëse.
“Edi Rama ka edhe një tra tjetër në mëndje, të verë tra edhe në rrugën Milot-Balldren. Të mos ketë ura komunikimi, por tra. Pro serbi vendos pengesë. I interesojnë ca euro, vetëm e vetëm që Kosova mos të ndihet. Rama sot u tregua i sinqertë, kur tha se Kosova është vend fqinj. Nuk e ka thënë asnjë udhëheqës shqiptarë. Mund të kenë bërë gabime më të mëdha, por kurrë nuk e kanë konsideruar vend fqinj. Ka qenë vend vëlla. Vendi më i dashur për të gjithë shqiptarët. Vend fqinj vetëm një armik i egër i Kosovës mund ta thotë këtë”, u shpreh Vasili.
