Sezoni i ri i basketbollit amerikan nisi me dy përballje të mëdha. Clippers mundën kampionët e Lakers në derbin në Los Anxhelos, ndërsa Brooklyn Nets u treguan të shkëlqyer nën udhëheqjen e yllit Kevin Durant dhe Kyrie Irving.
Nuk ishte mbrëmja e atyre që fitojnë titujt. Kampionët në fuqi të basketbollit amerikan, Los Angeles Lakers, u mundën në startin e sezonit në derbin ndaj Clippers. LeBron James dhe Anthony Davis u dorëzuan më së pari përballë Paule George, që udhëhoqi ekipin e tij drejt fitores 116-109.
Ai realizoi 33 pikë, nga të cilat 26 në pjesën e dytë, ndërsa ylli kryesor ekipit, Kawhi Leonard shtoi 26 pikë.
Brooklyn Nets, synon të sfidojë superfuqitë tradicionale dhe të bëhet skuadra numër 1 e qytetit kryesor të botës, për të lënë pas New York Knicks. Shpresat janë mbështetur te dyshja Kevin Durant-Kyrie Irving dhe dy yjet u përgjigjën siç duhet.
Durant u kthye në fushë pas një viti e gjysmë mungese për shkak dëmtimi, po aq i mirë sa dikur. Ish-ylli i Golden Stejtit, i cili fitoi dy tituj me kalifornianët, shënoi 22 pikë në 25 minuta në parket, ndërsa Irving ishte shënuesi më i mirë i ekipit me 26 pikë.
