Një grua kineze e akuzuar për vrasjen e shtatë njerëzve përfshirë dhe një fëmijë 3-vjeçar u deklarua sot në gjyq e pafajshme duke thënë se e kishin detyruar të kryente krimet.
Në gjyqin dy-ditor të 46 vjeçares Lao Rongzhi, e akuzuara tha se pranonte akuzat e pengmarrjes e grabitjes, duke thënë se viktimat ishin vrarë nga i dashuri i saj, bashkëpunëtor në krim, Fa Ziying, sipas dokumenteve të publikuara të gjykatës.
“Isha vetëm 21 vjeç… isha e trazuar,” citohet të kishte thënë Lao. “Isha e detyruar nga Fa dhe nuk largohesha dot nga frika se ai mund të lëndonte familjen time”.
Fa është gjykuar dhe ekzekutuar në vitin 1999 pasi u kap në shtëpinë e një viktime në Hefei, provinca e Anhui, teksa tentonte të merrte shpërblesën e shantazhit.
Ndërsa Lao kishte qëndruar në arrati derisa u kap nëntorin e vitit të kaluar në qytetin e Xiamen.
Prokurorët tashmë pretendojnë se Lao është njëlloj përgjegjëse për krimet.
“Lao e Fa kishin ndarje të qarta të detyrave për krimet e tyre, ku Lao luante rolin e rëndësishëm të gjetjes së viktimave në bare, duke i joshur ata në apartamentet e marra me qera, ku më pas lidheshin e kërcënoheshin. Lao e Fa kanë kryer serinë e krimeve së bashku”, thanë prokurorët.
Si provë për akuzat prokurorët sollën dëshminë e re të Liu Hua, e cila u mor peng dhe u grabit nga çifti në 1998.
Liu, nga Changzhou, nuk dëshmoi në gjyqin e të ekzekutuarit Fa dy dekada më parë.
Liu tha se ishte njohur me Lao-n në një bar dhe ajo e joshi në apartamentin e saj, ku ai u grabit dhe u qëllua me thikë.
Ai më pas mori në telefon gruan e tij për të sjellë shpërblesën e shantazhit prej 70,000 huan (8700 euro), por kur erdhi, edhe gruaja e tij u lidh nga pengmarrësit. Grabitësit ia kursyen jetën ciftit.
Juria e gjyqit pritet të japë së shpejti verdiktin për Lao-n.
