Një 32-vjeçar është arrestuar nga policia e Beratit për kanosjen me armë zjarri të një shtetasi tjetër.
Në pranga ka rënë shtetasi A.L, banues në Berat.
“Arrestimi i tij u bë pasi në lagjen ’30 Vjetori’, te tregu i mallrave të përdorura, ka kanosur për motive të dobëta, me armë zjarri pistoletë, shtetasin E. P., 26 vjeç, banues në lagjen ‘Jani Vruho’, Berat (i dënuar më parë për veprën penale ‘Kultivimi i bimëve narkotike’). 32-vjeçari, kur ka parë shërbimet e Policisë ka tentuar të largohet me shpejtësi, por është kapur pas disa minutash ndjekjeje”, njoftoi policia.
Materialet i kaluan Prokurorisë së Rrethit Gjyqësor Berat, për veprën penale “Armëmbajtja pa leje”, “Kanosja” dhe “Prishja e rendit dhe qetësisë publike”, shtuan të njëjtat burime.
