Lazio-Napoli ishte një përballja më e fortë e javës së 13-të në Serie A. Në “Olimpico” u zhvillua një ndeshje shumë e dyluftuar, por në fund fituan vendasit me rezultatin 2-0.
Ciro Immobile dhe Luis Alberto realizuan golat e fitores për ekipin e Inzaghit, që rikthehet te tre pikët pas dy ndeshjeve. Bomberi kryesor i Lazios zhbllokoi takimin në minutën e nëntë.
Marusic krosoi nga e majta dhe Immobile fluturoi në ajër duke dërguar topin në trekëndësh. Dyfishimi erdhi në minutën e 56-të. Presing lart i bardhekaltërve dhe gafë e Napolit.
Immobile i dhuroi një top Luis Albertos dhe fantazisti spanjoll shfaqi gjithë klasin e tij. Goditje e menjëhershme dhe tepër e saktë. Topi në rrjetë dhe 2-0 për Lazion.
Napoli nuk e mori veten pas këtij goli dhe e gjithë ndeshja përfundoi me fitoren e ekipit kryeqytetas, që është ngjitur në vend të tetë me 21 pikë. Tre vende më lart dhe dy pikë më shumë numëron ekipi i Gattusos.
Thomas Strakosha dhe Marco Alia e ndoqën nga stoli këtë sfidë për Lazios, ndërsa Vedat Muriqi u fut në fushë në minutën e 67-të. Pankinë gjatë gjithë ndeshjes edhe për dyshen Hysaj-Rrahmani të Napolit.
