Arma e gjetur rreth 100 m larg vendit ku u vra 25-vjeçari Klodian Rasha, duket se po mban peng grupin hetimor për mbylljen e hetimeve dhe dërgimin në gjykatë të kësaj dosjeje. Burime nga Prokuroria e Tiranës bëjnë me dije për Fax neës se hetuesit do kërkojnë ndihmën e ekspertëve të huaj për të zbuluar se kujt i përket arma, pasi deri më tani në të nuk janë gjendur shenja gishtërinjsh.
Sipas të njëjtave burime mësohet se është kerkuar ndihma e ekspertëve gjermanë që asistojnë në Policinë e Shtetit, për të mësuar për pistoletën, e cila është e vetmja enigmë që hetuesit nuk kanë arritur të zbardhin deri më tani për ngjarjen e rëndë. Nuk përjashtohet mundësia që në ditët në vijim arma të dërgohet në një laborator jashtë vendit. Burime nga institucioni i akzuës bëjnë me dije se, edhe gjatë ditës së premte është zhvilluar një takim mes grupit hetimor drejtuesve të lartë të SHCBA-së dhe ekspertëve gjermanë që asistojnë pranë policisë shqiptare për ecurinë e hetimeve.
Ndërkohë, prokuroria iu ka kthyer verifikimeve të pamjeve të kamerave të sigurisë për të parë nëse arma është hedhur aty nga ndonjë person, apo është lënë qëllimisht nga dikush pas ngjarjes. Përsa i përket vrasjes të së riut mësohet se hetuesit e kanë zbardhur të gjithe dinamiken e saj. Në dosje thuhet se në vendin e ngjarjes janë gjetur dy gëzhoja, ku një prej plumbave ka prekur në garazhin e rrugicës ku u qëllua i riu dhe tjetri në trupin e viktimës.
Sipas prokurorisë plumbat janë qëlluar në një lartesi nga 120 deri 150 centimetra dhe kjo për hetuesit shpjegon faktin se efektivi Nevaldo Hajdaraj ka qëlluar në pjesët e sipërme të trupit të te ndjerit dhe jo në gjymtyrët e poshtme. Për këtë pritet që akuza ndaj tij të rëndohet nga vrasje në kapërcim të kufijve të mbrojtjes së nevojshme në vrasje me dashje. 25-vjeçari Klodian Rasha mbeti i vrarë në orët e para të mëngjesit të 8 dhjetorit, pasi u qëllua me armën e shërbimit nga efektivi i shqiponjave Nevaldo Hajdaraj. /Faxnews/
