Me vdekjen e Diego Maradonas, janë hapur shumë çështje të tjera të cilat lidhen me pretendimet e disa personave që janë fëmijë biologjikë të legjendës.
Kampioni argjentinas, i cili vdiq muajin e kaluar në moshën 60 vjeç nga arresti kardiak, kishte dy vajza nga martesa e tij me Claudia Villafane. Me kalimin e viteve ka njohur edhe tre fëmijë të tjerë (Diego jr, Jana dhe Diego Fernando).
Pas vdekjes së tij, 25-vjeçarja Magalí Gil kërkoi një test të ADN-së, duke pretenduar se është vajza e Maradonas.
Gruaja e re, e cila është birësuar, deklaroi se dy vite më parë, nëna e saj e lindjes i zbuloi se babai i vërtetë mund të ishte Maradona.
Sipas avokatit të kampionit argjentinas, mostrat e ADN-së tashmë ekzistojnë dhe për këtë arsye nuk është e nevojshme të zhvarroset kufoma, e varrosur në një varrezë private pranë Buenos Aires.
