Këto janë pamjet që vijnë nga zyrat e Prefekturës Durrës, aty qytetarë kanë shkuar për të aplikuar për kompensimin monetar që marrin nga shteti për banesat e dëmtuara nga tërmeti.
Por, këto pamje janë vërtet të frikshme, në një kohë pandemie që po jetojmë. Qytetarët, pa distancë sociale po rrezikojnë njëri-tjetrin në këtë mënyrë. Një nga qytetarët tha për mediat se është i rraskapitur nga pritja pasi ka shkuar që në orën 05:00 të mëngjesit.
“Kam ardhur në orën 5 të mëngjesit po rrimë këtu kot me kot dhe nuk kemi asnjë shpresë se çfarë do të bëhet. Në orën policore kam ardh, nga halli,” tha ai.
Raportohet se pushteti vendor në Durrës ka rihapur mbrëmjen e kaluar aplikimet për 24 orë. Të gjithë qytetarët, banesat e të cilëve u dëmtuan nga tërmeti i 26-nëntorit 2019 dhe janë klasifikuar si të dëmtuara me pasoja të lehta dhe të mesme (DS1, DS2 dhe DS3), duhet të paraqiten para zyrave për të aplikuar. Por kjo gjë, siç edhe shihet, ka sjellë dyndje.
