Objektivi i parë që ne ndajmë të gjithë është të mundim COVID-19 në vitin 2021, theksoi presidenti i Këshillit Europian Charles Michel.
“Ne dëshirojmë të rimëkëmbemi dhe të transformojmë ekonominë tonë dhe të çojmë përpara Europën në botë”, deklaroi presidenti i Këshillit Europian, Charles Michel në një fjalim në Parlamentin Europian.
“Javët e fundit Këshilli Evropian ka qenë i paharrueshëm, me rezultate intensive, ne kemi kapërcyer pengesat dhe jemi bërë bashkë për të mirën e Europës. Të gjitha institucionet kanë luajtur një rol themelor”, nënvizoi Charles Michel duke folur në seancën plenanre të Parlamentit Europian.
“Do të doja të falenderoja kancelaren gjermane, Merkel dhe ekipin e saj për përpjekjet e tyre”, shtoi ai duke kujtuar regjimin e kushtëzimit të lidhur me sundimin e ligjit.
“Pavarësisht sfidave të COVID-19 ne jemi duke u rikuperuar”, theksoi ai, duke shtuar se BE ka luajtur një rol kyç në fushën e vaksinave.
