Nga Boldnews.al
Kundërshtimi ka një ndëshkim dhe lëpirja deri në jargavitje ka një shpërblim. Rasti më i fundit ku kryeministri Rama asgjë nuk e harron, është shkarkimi i Drejtorit të Teatrit Eksperimental Kiço Londo dhe emërimin në vendin e tij të regjisorit të gajasjes Altin Basha. Londo iku me brengë dhe me dhimbje duke lënë teatrin që e krijoi vetë.
Në këtë rast nuk ishte çështje aftësia, mungese vizioni apo vegjetim mbi një karrige posti, por qëndrimi që mbajti Londo për Tetarin Kombëtar. Ai u shpreh hapur kundër prishjes së tij dhe ishte një nga zërat që luftoi fort për të mbajtur në këmbë një godinë historike, por që iu shkërmoq nën këmbë nga fadromat e Bashkisë Tiranë dhe qeverisë në orët e para të mëngjesit të 17 majit të këtij viti.
Pasardhësi i Londos është Altin Basha, madje priti disi gjatë dhe mund të jetë i “zhgënjyer” se përse kokat e pushtetit u vonuan kaq shumë në emërimin e tij dhe hapjen e një gjoja konkursi…
“Nuk dua ta fsheh, ndihem i trishtuar. Ndjehem sikur më kanë larguar nga shtëpia ime. S’jam drejtor e skam qenë drejtor se nuk janë si unë. Ky teatër eshtë pjesë e bukur dhe vijë ndarëse” tha Kiço Londo në largim nga kjo detyrë. Këto fjalë i tha pikërisht para njerut që mezi priti të marrë atë post dhe që llogaritë i bëri me kohë. Partia të shpërblen dhe koha i erdhi…
Edhe drejtori i ri, Altin Basha, ka qenë i pranishëm në këtë ceremoni. Ai thotë se u bë pjesë e konkurrimit për postin e drejtorit të Teatrit Eksperimental që u hap nga ministria e Kulturës. “Eshtë pozicion që kam njëfarë eksperience. Kam menduar si mund të reformohet teatri shqiptar. Ky element është arsyeja që mora pjesë në konkurs” tha Basha.
E kamufluar pas një konkursi, emërimi i tij në fakt pritej dhe ishte çështje kohe kur ti servihej ky privilegj në formën e shpërblimit jo për atë që ka dhënë, por për atë që ka thënë. Basha ishte ndër regjisorët e parë që nën kamuflazhin e artistit u shpreh për prishjen e godinës së Tetarit Kombëtar dhe ngritjen e një godine të re. Në atë kohë u tha denduar se ishin një pjesë artistësh të joshur apo yshtur nga kryebashkiaku Veliaj që të dilnin pro shembjes së godinës histtorike të Tetarit Kombëtar.
Objekti u shemb, e bashkë me të jo vetëm arkitektura e vjetër e viteve 30’, por edhe ana shpirtërore e disa brezave të artistëve që në atë skenë kishin lënë jetën dhe i dhanë publikut me mijëra shfaqje.
Londo nuk ishte nga ata që me dëshirë hëngrën një karrem të servirur nga pushteti … E tha hapur se shkatërrimi i atij objekti do ishte krimi më i madh. Megjithatë dikush tjetër i bëri mirë llogaritë dhe Altin Basha që më së shumti njihet si regjisor i emisioneve satirike bëri “goditjen e jetës”, duke u shpërblyer me postin e drejtorit.
Kushdo që mendon se qeveria vetëm të shfrytëzon dhe nuk të shpërblen është mëse gabim, pasi në një formë apo në një tjetër të kthen benefitet që mund të jenë në projekte në shuma të konsiderueshme, ose poste publike. Këta janë njerëzit që sot Rilindja i nxjerr në ballë të parë, por më parë duhet të kenë dhënë prova se dinë mirë ti binden pushtetit.
