Të rinj të FRPD-së zhvilluan një marshim-protestë këtë të Mërkurë, pasi një efektiv policie qëlloi një ditë më parë një 25-vjeçar në Tiranë, duke i shkaktuar vdekjen.
Ata marshuan para kryeministrisë dhe Ministrisë së Brendshme. Protestuesit brohoritën “Rama ik”, “Policia e leshit”, “Qeveri e krimit”…
Një prej protestuesve u shpreh se kërkojnë dorëheqjen e Sandër Lleshajt, nga posti i Ministrit të Brendshëm.
Gjatë pasdites, është lajmëruar një tjetër protestë nga shoqëria civile.
Në një reagim zyrtar, SHÇBA bëri me dije se efektivi që qëlloi të riun është arrestuar për veprën penale “Vrasje e kryer në kapërcim të kufijve të mbrojtjes së nevojshme”.
“Nga hetimet paraprake është konkluduar se dyshohet se veprimet e punonjësit të Policisë N.H., bien në kundërshim me procedurat standarde të përdorimit të armëve të zjarrit. Ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme”, sqaroi SHÇBA.
Ngjarja
Sipas një rindërtimi paraprak të ngjarjes nga autoritetet: rreth orës 01:45 të së Martës, punonjësi i policisë N.H., efektiv i Patrullës së Policisë, gjatë shërbimit në rrugën “Dritan Hoxha”, ka qëlluar me armën e shërbimit shtetasin K.R., i cili ka gjetur vdekjen në spital. Shërbimi i Policisë i përbërë nga dy punonjës, të dislokuar në rrugën “Dritan Hoxha”, kanë konstatuar gjatë patrullimit një shtetas, i cili sillej dhe kryente veprime të dyshimta, çka bëri shkak që Patrulla të kryente verifikimin e shtetasit. Pas thirrjes së Policisë për të ndaluar, i riu nuk i është bindur thirrjes së efektivit dhe ka tentuar të largohet për t’i ikur policisë, e cila është vënë në ndjekje të tij nëpër rrugica.
Në ndjekje e sipër, punonjësit e Policisë kanë konstatuar se shtetasi kishte me vete një send në dukje armë zjarri, çka ka bërë që Patrulla të kërkojë përforcime nga Salla Operative duke dhënë rrethanat, adresën dhe karakteristikat e personit që po ndiqnin. Shtetasi K.R. është larguar me vrap dhe në ndjekje e sipër është përballur me punonjësin e policisë N.H., i cili pasi nuk ka arritur të kapë dhe prangosë atë, ka hapur zjarr me armën e shërbimit në drejtim të tij. Për pasojë, ky shtetas është plagosur dhe më pas ka gjetur vdekjen në spital.
Viktima, i paarmatosur
Zyrtarisht, u njoftua se u gjet një pistoletë në rrugicat ku ndodhi ndjekja e të riut nga efektivi i policisë, por viktimës nuk iu gjet armë zjarri me vete.
Sipas hetimeve, “gjatë kqyrjes së vendit të ngjarjes është sekuestruar në cilësinë e provës materiale një armë zjarri pistoletë, e gjetur në një nga rrugicat ku ka kaluar viktima gjatë ndjekjes nga punonjësit e Policisë”.
