Një 25-vjeçar, Klodian Rasha, është qëlluar për vdekje nga një efektiv policie. Krimi policor ndodhi rreth orës 01:45 të së Martës, sipas njoftimit nga autoritetet. Pas një ndjekje, një efektiv, në pamundësi për ta arritur, e qëlloi me armën e shërbimit të riun disa metra larg banesës, duke i shkarkuar vdekjen.
Në njoftimin zyrtar për ngjarjen, policia deklaroi se efektivi që shkrepi armën, kujtoi se 25-vjecari që me gjasë vraponte për ti shpëtuar një gjobe për shkeljen e karantinës, “i drejtoi punonjësit të policisë një send të fortë në dukje armë zjarri”.
Megjithatë, viktima nuk rezultoi të kishte armë zjarri me vete. Autoritetet njoftuan se u gjet një pistoletë në rrugicat ku ndodhi ndjekja e të riut nga efektivi i policisë, por kurrsesi se viktimës iu gjet armë zjarri me vete. Nuk është provuar se i riu ishte i armatosur dhe aq më tepër që kërcënoi efektivin që qëlloi ndaj tij.
Efektivi që shtiu mbi Klodian Rashën është arrestuar për veprën penale “Vrasje e kryer në kapërcim të kufijve të mbrojtjes së nevojshme”. “Nga hetimet paraprake është konkluduar se dyshohet se veprimet e punonjësit të Policisë N.H., bien në kundërshim me procedurat standarde të përdorimit të armëve të zjarrit. Ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme”, njoftoi SHÇBA.
Për këtë ngjarje të rëndë kanë reaguar personazhe të njohur të showbiz-it, mes tyre edhe moderatorja Klea Huta.
E tmerruar nga kjo ngjarje, ajo ka shkruar një status të gjatë në InstaStory ku shpreh revoltën për këtë veprim të kobshëm.
“Vetëm para pak orësh mora lajmin e kobshëm të vrasjes së 25-vjeçarit. Cfarë po të ndodh o vendi im? Si vritet një fëmijë nëne me plumb në zemër në mes të natës nga një polic i shtetit? Siii? As që dua t’ia di për shkakun. ai mund të ishte babai, burri, vëllai, kushëriri im, shok e mik, mund të isha unë por mbi të gjitha është jetë njeriu që ti policia e shtetit tim e vrave e ja preve jetën e ëndrrat në mes. Drejtësia të bëjë detyrën dhe pse jetën nuk ia kthen më mbrapsht atij e lotët e nënës s’i than dot kurrë më. Nuk mund ta besoj që kjo ndodhi në vendin tim. Jam e tmerruar.”- janë fjalët e Kleas.
