Almeda Abazi zbuloi se ishte sërish në pritje të ëmbël dhe bashkë me partnerin e saj, Tolgahan Sayisman, do të bëhen prindër për herë të dytë. Gjatë një bashkëbisedimi me ndjekësit në Isntastory, Almeda rrëfeu edhe disa detaje të tjera, përfshirë edhe nëse shtatzënia e saj ishte me apo pa plan.
“Pa! Por sigurisht që shumë e lumtur, dhe pse surprizë!”- shkroi Almeda.
Ndër të tjera, ish-Missi u shpreh se në shtëpinë e tyre flitet gjithmonë shqip dhe për këtë arsye edhe Efehanit, djalit të saj të vogël, i flet në shqip. Për më tepër, edhe kënga e preferuar e të voglit është në shqip.
“Këndon gjithë ditën ‘qingji vogël pse mendueshëm, be be baaaa’ dhe është kënga e preferuar. Ia mësoi nona”, zbuloi Almeda.
Pak më herët, ajo tregoi se kjo shtatzëni nuk është aspak si e para, pasi ndihet shumë e lodhur dhe i përzihet herë pas here, ndërsa me Efehan-in ka qenë shumë energjike dhe donte të shëtiste. Nisur nga këto simptoma, ndjekësit janë të bindur se bukuroshja do të sjellë në jetë një vajzë.
Ajo bashkë me Tolgahan kurorëzuan dashurinë e tyre me martesë në vitin 2017, ndërsa në vitin 2019, erdhi në jetë Efehan.
