Nga BoldNews.al
Sinan Ahmeti, një këshilltar bashkiak në Sarandë, njëkohësisht edhe përgjegjës sigurie në portin e qytetit jugor, është marrë i pandehur nga Prorkuroria, pasi në Korrik 2019 ka goditur për shkak të detyrës me levë dhe i ka shkaktuar dëme të mëdha një zyrtari të Inspektoratit Ndërtimor të Bashkisë.
Inspektori T. Simoni dhe kolegë të tij gjendeshin në verën e vitit të kaluar, për evidentimin dhe prishjen e ndërtimeve të paligjshme në bashkinë e Sarandës.
Mes objekteve në listën e Inspektoratit Ndërtimor të Sarandës ishte edhe një mur rrethues, i ndërtuar pa leje, nga këshilltari bashkiak Sinan Ahmeti dhe familjarë të tij.
Në momentin që inspektorët e Bashkisë kanë kërkuar të prishin murin rrethues të shtëpisë së Sinan Ahmetit, ky i fundit ka reaguar ashpër, duke u konfliktuar fizikisht.
Më tej, Sinan Ahmeti, i emëruar këshilltar bashkiak i majtë pas votimeve mono-partiake të 30 qershorit 2019, ka goditur me levë inspektorin T. Simoni, i cili gjithashtu është nomenklaturë e Bashkisë së qytetit, e drejtuar po nga e majta.
Pas më shumë se një viti hetimesh, Prokuroria e Sarandës ka dërguar çështjen në gjyq.
Në faqen e gjykatës së Sarandës gjenden të dhëna për këtë procedim penal.
Përveç Sinan Ahmetit, të pandehur janë marrë edhe bashkëshortja dhe djali i tij, të tre të akuzuar për “goditje për shkak të detyrës” ndaj inspektorit bashkiak, T. Simoni.
Kjo ngjarje, me sfond penal, ka pasur edhe një lloj ndikimi politik në Sarandë, zonë nën menaxhimin politik të “superdeputetit” të Jugut, Alket Hyseni.
Të dyja palët në këtë konflikt, si të pandehurit, ashtu edhe i dëmtuari, duket se janë nga e njëjta përkatësi politike, përsa kohë që mbajnë funksione në administratën e majtë të Bashkisë së Sarandës.
Prej disa vitesh, deputeti i Partisë Socialiste, Alket Hyseni, është ngarkuar me përgjegjësinë e koordinatorit politik për zonën e Bregut të Jugut.
Konflikti mes “rilindasve”
Në 18 Korrik 2019, ndërsa punonjësit e Inspektoratit Ndërtimor Urbanistik Vendor të Bashkisë Sarandë, shkuan për të shembur një mur që Sinan Ahmeti, 52 vjeç, kishte ndërtuar pa leje për të rrethuar banesën e tij, ky i fundit është konfliktuar me inspektorët e INUV-it.
Madje, gjatë përleshjes fizike, Ahmeti ka goditur me levë në kokë një prej inspektorëve. 52-vjeçari ka pretenduar se ndërtimin e murit e ka bërë me leje dhe se INUV nuk kishte të drejtë t’ia shembte.
Në mbështetje të inspektorëve shkoi Policia Bashkiake, ndërsa Policia e Rendit mbërriti në vendin e ngjarjes pas marrjes së njoftimit se kishte përleshje.
Pronari i banesës së rrethuar me këtë mur Sinan Ahmeti ka kundërshtuar me dhunë, madje ka goditur me levë inspektorin e INUV, Tonin Simoni, duke pretenduar se kishte dokumentacionin e duhur dhe se ishte në rregull me ligjin për ndërtimet.
Policia, e cila është ndodhur menjëherë në vendngjarje ka shoqëruar autorin, ndërkohë që inspektori i INUV ka marrë mjekimin në spital, si dhe është këqyrur edhe nga mjeku ligjor. Pas shoqërimit në Komisariatin e Policisë në Sarandë të 52-vjeçarit Ahmeti, inspektorët e INUV kanë vijuar procesin e shembjes së murrit rrethues që i ndaluari kishte ngritur pranë banesës së tij.
