Ish-boksierja braziliane, Viviene Obenauf, është arrestuar dje nga policia zvicerane teksa mbi të rëndojnë akuzat e vrasjes së bashkëshortit të saj.
Policia raporton se viktima është gjetur me “dëmtime të rënda të shkaktuara prej goditjes me çekiç”. 34-vjeçarja Obenauf pretendohet se ka goditur për vdekje bashkëshortin e saj, por ende nuk dihen shkaqet.
Ish-boksierja, me famë në Brazil, u tërhoq nga sporti vitin e kaluar duke iu përkushtuar biznesit të prodhimit të ushqimeve dhe fitness-it.
Ashtu siç raportojnë mediat e huaja, ajo ka ushtruar dhunë edhe më herët. Njëri prej partnerëve të saj deklaroi se vite më parë Obenauf e ka goditur në gjendje të dehur 4-5 herë me grusht.
Obenauf zhvilloi 20 ndeshje në karrierë me bilancin 14 fitore (9 me KO) dhe 6 humbje, ndërsa në janar të vitit të kaluar ajo u martua me suedezin Tomas, i cili zotëronte një restorant.
